आखाडा लाईव्ह | जळगाव : शहरातील एका अल्पवयीन मुलीला ड्रग्जच्या आहारी लावून तिच्यावर अत्याचार केल्याच्या संतापजनक प्रकरणातील संशयित ड्रग्ज पेडलर रईस हरून देशमुख याला जळगाव महापालिकेने मोठा दणका दिला आहे. रईस देशमुख याच्या सुप्रीम कॉलनी येथील अनधिकृत बांधकामावर सोमवारी रात्री मनपा प्रशासनाने बुलडोझर चालवत ते जमीनदोस्त केले. प्रशासन आणि पोलिसांच्या या आक्रमक कारवाईमुळे जळगावातील ड्रग्ज माफियांमध्ये प्रचंड खळबळ उडाली आहे.
अशी झाली कारवाई…
कडेकोट पोलीस बंदोबस्त: सुप्रीम कॉलनी भागात सोमवारी रात्री ८ वाजता अतिक्रमण निर्मूलन विभागाकडून ही धडक कारवाई करण्यात आली. यावेळी कोणताही अनुचित प्रकार घडू नये यासाठी पोलिसांचा तगडा बंदोबस्त तैनात करण्यात आला होता.
महापौरांचा पुढाकार: शहरात कायदा व सुव्यवस्थेचा प्रश्न निर्माण होऊ नये म्हणून महापौर दीपमाला काळे आणि नगरसेवक अरविंद देशमुख यांनी कारवाईपूर्वी एमआयडीसी पोलीस ठाण्यात जाऊन अधिकाऱ्यांशी सविस्तर चर्चा केली होती.
काय आहे नेमके प्रकरण?
जळगाव शहरात एका अल्पवयीन मुलीला जाळ्यात ओढून, तिला ड्रग्जची सवय लावत तिच्यावर अत्याचार केल्याची भयंकर घटना नुकतीच उघडकीस आली होती. या प्रकरणी पीडितेच्या घराच्या आवारात ड्रग्ज आणून देणारे संशयित निर्मल दिनेश तिवारी, जय चौधरी आणि गौरव पुरोहित यांच्याविरुद्ध ‘पोक्सो’ (POCSO) कायद्यासह विविध गंभीर कलमांखाली गुन्हे दाखल करण्यात आले आहेत.
अशी उलगडली ड्रग्ज तस्करांची साखळी:
पेडलर्सला अटक: मुख्य संशयितांना ड्रग्ज पुरवणाऱ्यांचा शोध घेत असताना, स्थानिक गुन्हे शाखेने (LCB) ३ जून रोजी बाजार समिती परिसरात सापळा रचला. यावेळी ड्रग्ज विक्री करताना रईस देशमुख, तौसिफ सय्यद आरिफ आणि कृणाल ऊर्फ लकी पाटील या तीन पेडलर्सना रंगेहाथ अटक करण्यात आली.
पुढील धागेदोरे: चौकशीत कृणाल ऊर्फ लकी पाटील याने सदर ड्रग्ज अन्वर पटेल याच्याकडून आणल्याची कबुली दिली. या माहितीच्या आधारे पोलिसांनी रविवारी बोरनार येथून अन्वर पटेल यालाही बेड्या ठोकल्या.
मुख्य सूत्रधार फरार: या संपूर्ण रॅकेटमध्ये ड्रग्जचा मुख्य पुरवठा करणारे अमजद ऊर्फ बिल्डर शेख आणि इम्रान ऊर्फ इमा हसन हुसेन भिस्ती हे दोघे अद्याप फरार असून पोलीस त्यांचा कसून शोध घेत आहेत.
मुख्य आरोपी फरार असले तरी, अटकेत असलेल्या रईस देशमुखच्या बेकायदेशीर संपत्तीवर हातोडा मारून पोलीस आणि मनपा प्रशासनाने ड्रग्ज तस्करांना एक कडक इशारा दिला आहे.
