आखाडा लाईव्ह | पुणे : जळगाव जिल्हा मध्यवर्ती सहकारी बँकेच्या संचालक मंडळाच्या अडचणीत वाढ होण्याची शक्यता आहे. बँकिंग रेग्युलेशन (सुधारणा) अधिनियम, २०२५ आणि आरबीआय (RBI) च्या मार्गदर्शक तत्त्वांनुसार, बँकेच्या संचालक मंडळावर अपात्रतेची कारवाई करण्याबाबत सहकार आयुक्त व निबंधक कार्यालयाने नाशिकच्या विभागीय सहनिबंधकांना महत्त्वाचे निर्देश दिले आहेत.
काय आहे प्रकरण?
झुरखेडा येथील लोकनियुक्त सरपंच सुरेशआप्पा गो. पाटील यांनी जळगाव जिल्हा मध्यवर्ती सहकारी बँकेच्या संचालक मंडळाबाबत सहकार विभागाकडे तक्रार दाखल केली होती. या तक्रारीची दखल घेत सहकार आयुक्त व निबंधक कार्यालयाने आता तातडीने पुढील कारवाई करण्याचे आदेश दिले आहेत.
सहकार आयुक्तांचे तातडीने कार्यवाही करण्नियाचे निर्देश
सहकार आयुक्तांनी नाशिक विभागीय सहनिबंधकांना संबंधित निवेदनावर तातडीने कार्यवाही करण्यास सांगितले आहे.
नियम आणि कायदेशीर तरतुदी: ही कारवाई बँकिंग रेग्युलेशन (सुधारणा) अधिनियम, २०२५, आरबीआयची मार्गदर्शक तत्त्वे आणि राज्य सहकारी निवडणूक प्राधिकरणाच्या नियमांच्या अधीन राहून केली जाणार आहे.
संबंधित अर्जादाराला माहिती: या कारवाईबाबत संबंधित अर्जादाराला परस्पर कळविण्याचेही आदेशात नमूद करण्यात आले आहे.
बँकेच्या संचालक मंडळावर अपात्रतेची टांगती तलवार असल्याने सहकार क्षेत्रात या निर्णयाची मोठी चर्चा सुरू झाली आहे. आता नाशिक विभागीय सहनिबंधक यावर काय भूमिका घेतात, याकडे सर्वांचे लक्ष लागले आहे.
