आखाडा | (विशेष प्रतिनिधी) बारडोली (सुरत) : गुजरात मधील सुरत जिल्ह्यातील बारडोलीजवळ आज एक अत्यंत थरारक आणि भीषण अपघात घडल्याची धक्कादायक माहिती समोर येत आहे. बारडोलीजवळील उवा गावाजवळ महाराष्ट्र पासिंग असलेल्या दोन बसेसची समोरासमोर जोरदार धडक झाली. हा अपघात इतका भीषण होता की, धडक झाल्यानंतर त्यापैकी एक बस रस्त्यावरच पलटी झाली आणि तिने पेट घेतला. प्राथमिक माहितीनुसार, या दुर्घटनेत ५ प्रवाशांचा होरपळून व जागीच मृत्यू झाला आहे.
पलटी झालेल्या बसला लागली भीषण आग; मृतांचा आकडा वाढण्याची भीती
मिळालेल्या माहितीनुसार, दोन्ही बसेसची समोरासमोर धडक झाल्यानंतर पलटी झालेल्या बसला अचानक भीषण आग लागली. आग इतकी वेगाने पसरली की बसच्या आतमध्ये मोठ्या प्रमाणावर प्रवासी अडकून पडले. आगीच्या भक्ष्यस्थानी पडल्यामुळे आणि प्रचंड धुरामुळे प्रवाशांना बाहेर काढण्यात बचाव पथकाला मोठ्या अडचणींचा सामना करावा लागत आहे. यामुळे मृतांचा आकडा आणखी वाढण्याची भीती व्यक्त केली जात आहे.
अग्निशमन दल आणि पोलीस घटनास्थळी दाखल
अपघाताची माहिती मिळताच स्थानिक पोलीस प्रशासन, अग्निशमन दलाच्या गाड्या आणि आपत्कालीन बचाव पथके तातडीने घटनास्थळी दाखल झाली आहेत. अग्निशमन दलाकडून बसला लागलेली आग विझवण्याचे शर्थीचे प्रयत्न सुरू असून, बसमध्ये अडकलेल्या इतर प्रवाशांना सुखरूप बाहेर काढण्यासाठी युद्धपातळीवर बचावकार्य राबवले जात आहे. जखमींना तातडीने जवळच्या रुग्णालयात उपचारासाठी हलवण्यात येत आहे.
